سلم الحكايات

ولسّه راجعة من شغلك

وشايلة في ايدك الشنطة

ولسّه بتيجي وتشاغلك

حكاوي كتير لكن صامتة

ومشهد حركة براكي

وجواكي الحاجات ساكتة

وبيخبّط على راسك

سؤال لحلمك المهزوم

ورسمة ف قلب كراسك

لشكل الفارس المزعوم

وامتى هييجي بس ف يوم

ويسند سلم الحكايات

يرد الواقع المسجون

أنا آسف مفيش اجابات

ومش نازل من الاوتوبيس

حصان راكب عليه فارس

ولو ترضى خطى النواميس

هتبعتلك ولد لابس

قميصه الأخضر البهتان

ولون احلامه زيك سمر

مهوش فارس بني شيبان

ولا سايق نياقه الحمر

لكنّه جاي على مهله

ويوم حلمك هيندهله

لأنك زيّه منسيّة

وسامحي فيه كمان جهله

بحواديت الرومانسية

عشان معمولة م السكر

وهو عَرقُه دايب ملح

وعايش بس مش أكتر

ويتشعبط في لحظة فرح

ومستني رضا بحورك

ولو كانوا ضلام كاحل

يجيلك حتى لو عايم

وناحية وطنك الحالم

هتتمشوا لحد الصبح